Jacme Delmas
Actualament, los laboratòris de sentat d’Occitània se prepáran ambe formacion obligatòria suls prelèvaments (sanguins e autres). Los directors d’espital aprenon pauc a pauc que, lèu, serà interdich de far una presa de sang. La rason es la darrièra ordenança de la ministra de la sentat, Roselyne Bachelot-Narquin (donc pas de passatge debans los deputats, nimai los senadors). Los laboratòris, per subsistar, deuràn passar per una certificacion amb pron de contranhas e complicada. Per aiçò far, devon, entre tempses, se portar garants dels prelevaments faits pels praticians (es de dire las infirmièras que zo fasián abans sens cap dificultat especiala, nimai problèma de securitat sanitària).

Las infirmièras seràn sul pic autorizadas de prelevar se son formadas e agreadas pels laboratòris, exit donc las infirmièras interimàrias e remplaçantas... o vengudas d’autres estats, pels remplaçaments.
La segonda consequéncia, e non la mendra: prelevaments a l’ostal seràn interdichs! Los malauts deuràn donc anar al laboratòri pels mejans pròpris, quin que fosquèsse l’estat o alavètz se fa espitalizar!

Tresena consequéncia: los laboratòris s’estant tenguts d’equipar de maquinas iper-performantas, o vendudas aital, ambe lo mens de personal possible (remborsament dels examèns sanguins o autres als laboratòris a la baissa!) per poder perségre un foncionament normal, se van dever regropar (la tòca finala es ges mediatizada: 1 a 2 labòs sonque per departement occitan).

* Aquesta informació la trobaràs complerta al setmanari EL TRIANGLE.